星期五, 4月 22, 2011

唔睇冇話題:《3D肉蒲團》

有幸唔小心「掹車邊」參加了《3D肉蒲團》女子午夜場,所謂女子,是一起去的都是女的,同場當然還有許多內地表叔表嬸表姐表弟,男女都有,全院滿座好鬼熱鬧。這種場面好耐未試過,隨時新年都冇咁好氣氛呀。

有男同事聽到我們要去看,據說不知怕醜(啲女角醜?)抑或怕冇嘢睇(兩大AV女陪伴佢哋成長),都不肯一同去看,還有人聲稱「沒有興趣」。

看這套「有劇情的情慾片」,覺得很cult,很港式,應看成一件「事」,而不只是一套「戲」:事前的炒作,男女演員老細都混了好大趟水,宣傳攻勢唱了近一年,好多人以為早就落畫,或者好似上咗畫成年,那是銀幕下炒作成功,很乎合娛樂版愛點子(最緊要露到盡)的胃口。

然後到上畫前夕,有飛在手倍感自豪,連話俾人聽今晚去睇《3D肉蒲團》都可以臉不紅氣不喘(梗唔會喘啦),反而像過年買到星爺戲票咁cult。到了進場,四周觀眾的言語打扮反應又是另一道風景,當政府用6千蚊分化新移民和香港人之際,這部戲卻把雙方融合,內地人和港人各佔一半,但場內一片和諧境象,曾蔭權好應該買飛入場體察民情囉。

是的,這是一部向內地示威的「港產片」,尺度超晒標,全部廣東話,就係唔會顧全大陸,幾寸。但同胞要看,無論是精神翻牆抑或肉體自由行,總有方法見到雷凱欣的「老點」。曾經何時,港產片就係咁寸,雖然這些都是計算,但很有港式醒目仔精甩尾但又俾佢博到抵佢贏一舖的感覺。

內容o麻,露好多點,但不覺得色情,因為太誇張太cult,而且笑位多,但係請問啲對白可否順暢啲?仲有,短返半個鐘就好啦。至於演員,我諗佢哋真係認真做戲......做緊喜劇囉。

完場後件事仲未完,因為對住網絡「專業」影評仲可以笑餐飽,塵世間(其實係香港地)最痛苦的事,係人哋笑到碌地,或者罵到趴地,你搭嘴得來其實知發生乜嘢事(否則當年點會萬人空巷換Snoopy?)。所以話,講到尾真係要焗住入場睇。

香港人,好多嘢都焗住,一路鬧住一路上賊船,慣架啦!

1 則留言:

Tee 提到...

寫得好,我去睇都係湊熱鬧。