星期五, 12月 05, 2008

無恥老闆‧無恥報

p.s:自從這篇blog文貼出,發現本卜的瀏覽量不尋常地上升,即係平日得一兩隻烏蠅,近日多咗兩隻白紋伊蚊,而且收到幾位無聊(或者無間道)朋友「關心」,問我家居門口想要甚麼顏色,怕我恐遭遇不測。需知道,小人自然欺善怕癲,我都好怕傻人發現,唯有屈服,大量刪改本文內容。即係話,原來我都好適合在無恥報工作,絕對係人才呀,家下亂世,有機上位呀!主席,請唔請奴才呀?

總之,經刪減後內容如下,邊份係無恥報,邊個係無恥老闆,自己諗諗啦!

看過、聽過、體驗過許多傳媒界的人和事,哭過、笑過、平淡過、沉悶過,一直都知道,某個有「傾向」的傳媒機構(為免惹官非,只係匿名)的傳媒機構,那裏的氣氛、制度和風格,絕對配得無良、無聊,以及......無恥!但想不到,正如同事K先生的msn排頭所形容「無恥到巔峰!!珠穆朗瑪峰!!!!」。

看到別人的慘況,身邊人發起「無恥報運動」(都係o個句,怕俾人告,唔敢開名),參與者要起誓,從今以後絕不付錢買無恥報。而其他人亦紛紛發毒誓,精彩節錄如下:

K先生:我用人格同下半生的性能力發誓!!!!就算世界得番一份報紙, 我都唔會買無恥報!~!!!!

卜主:我用終身幸福保證,就算轉行同瞓街,呢世都唔會為無恥報打工。

舊同事W先生:我寧願抱埋兩個仔同老婆一齊拎綜援,都唔敢入無恥報!

好友C小組:以前衰過一次已經後悔一世,若果再衰第二次,我怕我唔原諒自已,一定唔為無恥的動物老闆做打手。

舊同事why先生:俾十萬一個月我都唔做,怕袋唔實,折福。

路人甲:嗰間公司仲猛鬼過猛鬼屋,唔知邊個係人,邊個係鬼,若果想變鬼先會去,我唔想死住。

6 則留言:

mysimplelife 提到...

話哂都曾經響呢行打滚, 呢間公司既奇聞早已有聞.所以當年被邀加盟我都洒晒手唔駛客氣.
今日見到佢向死對頭發律師信, 話對方偷料, 真係笑左出黎.

wongdull 提到...

得啖笑...其實係自打咀吧...可以不理
反而我對K先生下半世的性能力是否得保有興趣…

Nobody 提到...

唉,總之知就笑死,不過裏面的人就喊死。
我想K先生咁好色,一定會拼命遵守毒誓......

cwa 提到...

你大膽喇你....你忘記咗曾經喺嗰度做過?
因住小氣鬼番你舊....快撈...做嘢....

你想間屋油咩色..應該寫埋出嚟...等人地做嘢時..順便揀你鍾意隻色嘛....
(~_~)

匿名 提到...

靚女, 最近才開始睇你的卜, 追番d逾期都追死咁滯...

Sa

Nobody 提到...

嘩,sa姐乜咁賞面呀?舊嘢唔駛睇啦,都係亂寫啫,無乜價值呀。總之多謝捧場呀!^_^