星期二, 4月 01, 2008

痛恨iPod,及其他霸權產物

跟奇洛里維斯一丁點兒都不像的同事K先生,早陣子因為iPod壞了而打算選購新的mp3機,這邊廂明明聽他說不再買蘋果機,過幾天卻見他歡天喜地的拿想iPod Touch,還四出迫別人拿去試玩,打算荼毒人間。

坦白說,screen真的靚爆鏡,亮麗到如K所說:好「屈機」。(這是最新最潮用語,大意是指低手遇著高手,無力低抗,只好舉投降,坊間很多細路在講「好屈」,或者「好屈機」,即是好勁、好勁、好抵、好無得頂,語意其實幾複雜,想識多o的,可上網絡大典學o野)

拿在手中iPod Touch,看影片或圖片都好流暢,甚至好過在電腦屏幕看,播放音樂時的音色當然一貫不錯,成為潮人首選當然有其道理。但是,自問走在潮流末端的我,發誓除非蘋果改變iTunes霸道的入歌方式,否則今生與來世,我都肯定不會買iPod產品,說得偏激一點:送都未必要!(大家不妨做實驗,送些正貨給我吧。)

其實早在數年前已想過買iPod,但一直聽聞入歌好煩,加上有入無出,不符合檔案共享原則(即是廣傳老翻檔案),於是一直卻步。誰料還是逃不過iTunes的折騰,令我從此以後,極落力地詛咒這種產品,幾乎想到泰國買鬼仔落降頭!

災難由去年某位作為電腦白癡的損友開始,那位家中放有一部古董電腦的舊同事M先生,不知是否「羅友痕」又扮in,走去學人買iPod,然後一個唔該(查實係唔該都冇句)叫我幫手入歌,噩夢從此開始。我家的電腦購於02年尾,其實應該列入國寶文物系列,偏偏又沒壞兼用得,加上機主銀包長期乾塘,自然想換機都無$$,就是一直沿用至今,其實都算幾好用,正常狀態下,開幾個IE windows + photoshop + winamp + msn + outlook都沒問題,雖然有時會鬧脾氣,但都不想隨便換掉(有人送又唔同講法)。

偏偏我的電腦就是命犯天煞iPod,每次裝了iTunes,就像引入心肝脾肺腎的癌細胞,整部電腦變成末期病人,常常死機,也激死機主。最初那次,因為不擅長setting,軟件扮user friendly在電腦內抄家,把所有音樂擋都load出來,死幾千次機先明白是甚麼的一回事;搞了半天,終於入好歌,然後又失驚無神失去聯繫,回復後所有歌都石沉大海,頂!就算鬧Steve Jobs佢都聽唔到啦,好鬼谷氣!

死死氣再搞過,終於入好歌,但原來不能為整個歌庫做back up,雖則說保護自識版權,但請問有沒有保護用家心血呀?那場噩夢,近日重臨,當然又是來自M先生,這趟還多一位W先生,兩部iPod夾攻,慌死我有覺好瞓。
以為有了上次經驗,這次會好過一點,誰料............仲衰,不知是不是因為裝了新的antivirus,一裝iTunes就有很多程式在背後運行,死了又死死了又死死了又死死了又死......入了一半歌又死,有時又入唔到.......我想死!尊貴的Steve Jobs,你知否不是個個電腦用家都有又快又新的電腦呀?別說我屈iPod,只要查閱工作管理員,就看到有關apple的程式不斷出現,我的電腦果然被apple毒纏身!還好我今次學精了,先做了歌曲backup才入歌,死多幾次都容易翻生。

幾經辛苦,排除萬難,終於把歌入完,於是,立即format hard disk,同iTunes因了解而分手!iPod靚成點都好,音色如何出色都好,依然是我痛恨的高科技電子零件。

推而廣之,作為網上自由派,對所有霸權式的限制都很痛恨,若果有得選揀,必定無幫襯。其中一項就是yahoo blog的留言系統,限制了只有blogger才可留言,我的抵制方法,就是只做CD-R,即係只看不留言,堅持不開blog。雅虎想用這個方法吹大blogger人數,是下三流的手段,一個半個人的力量雖然微小,但我才不想屈服。

4 則留言:

匿名 提到...

m先生俾機會你學多樣野,你應該好好珍惜,唔好只係埋怨,有朝一日你會變熟手技工,到時多謝佢都黎唔切啦!

cherry 提到...

恐怕你所托非人, 我已經對物件產生興趣, 正扣留其中一部仔細研究; 不排除買一部P.S.好遺憾你有個咁無懶的前同事m先生
再p.s個芒果好甜

匿名 提到...

我都係識電腦唔識ipod, 鄙視霸權產物, 又啱啱遇著個好似你m先生噉嘅朋友. ^_^!!
多謝你篇文分享, 又好彩俾我撞到入嚟. 等我可以有d心理預備.
諗落都係harddisk度開多個partition, anti-virus都唔裝, itune完就同佢從此byebye算啦.

純屬過路

Nobody 提到...

呢個世界,真係有好多m先生之流.........唉.......
不過諗返轉頭,自已開頭咪又係拖累電腦友的x小姐,所以就算有怨言(對ipod),一樣會幫朋友搞掂佢,因為當年都有好多人幫自己o麻。