星期二, 8月 07, 2007

花果山甩毛王

近期同事同業間的熱門人物,叫做「花果山甩毛王」,事緣舊公司每逢中午及傍晚都有免費水果供應,最常見是蘋果、橙和香蕉,偶爾有荔枝、龍眼和布冧,質素飄忽沒有保證,故筆者甚少費力爭奪。但不少同事「落力支持」,飛身撲前唔使睇係咁猛搶,當中尤以男士門最神勇,叫一眾靚太師奶退避三舍,可以預見,若超市廁紙大減價,他們肯定會成為最終勝利者。

某位頭頂發光的四眼中年男子,工作時腦筋手腳進入退化狀態,唔諗唔做最好唔使寫,但每逢阿姐推出水果車,他的嗅覺似乎較緝毒犬更靈,縱使正在埋首開會都會立即彈起,一個箭步衝到十多米外,幸好百一米欄賽事的盡頭沒有擺放水果,否則劉翔都要食塵。

舊公司早前已頒布法令,嚴禁持膠袋「採摘野果」,但反而成為該名男子的優勢。當他攝身進入人堆後,就立即施展「大衛高柏雞」的獨門偷桃手絕技,以超越人類的潛能徒手搶走超大量野果,然後還能扮作若無其事全身而退。返回座位時,他會從身體各處(即係邊度?自己諗啦)把「戰利品」翻出來,在桌面推起一座壯觀的「花果山」,而且沒有他肯首,旁邊的猴子猴孫絕不能觸碰到他的山頭,甚有美猴王孫悟空的風範,可惜他的毛髮越發稀疏,只配被稱為「甩毛王」,如此啜核的名字當然是「花名創作總監」CD(creative director)的傑作,真是創意爆燈!

其實每個人心中都有一座花果山,每逢放假時,我都會在家堆出一座山,當然與甩毛王的「免費午餐」不同身價,總認為人生能吃的quota有限,放假時份當然要食好o的。今天我堆起的花果山,成份有北京水蜜桃、美國車厘子、據說來自澳洲的小粉紅蘋果、「胭脂紅」石榴及超大南華利等,全部都是街市精選,很喜歡傳統街市的雜亂生命力,這種市井式的生活感,當老闆說「夠晒枰啦,多o左送埋俾你啦」,無論是真是假,都很窩心。

2 則留言:

匿名 提到...

我要叨光! CD原創為花果山美侯王, 是我更正為甩毛王呢!

Nobody 提到...

叻啦叻啦,使唔使同你寫篇澄清告示呀? ^_^