星期二, 1月 10, 2006

樂壇雜感

7、80年代歌手近年群起復出搶錢,大部份都來自「我的黃金時代」,作為老餅歌迷,荷包當然血流成河啦。

但係,評心而論真係失望居多,由喜歡多年、當係神咁拜o既達明一派,到臨退出先愈o黎愈鍾意,當年開3場演唱會,我就睇o左兩場o既草蜢,以至近年多次捧場o既林憶蓮,全部都與期望不符,冇激動的重遇,甚至冇顫抖的感動。

主觀場認為,達明最好的演唱會已經係過去式,案發地點在新伊館,場地夠細,氣氛夠warm,各階層fans可以迫埋一齊,我落重本買o左400蚊飛,並排而坐的係商台DJ群,林海峰好似小朋友咁興奮。

上年的演唱會,一開始所有fans就high晒,包括我在內,不過唔係natural high,而係emotional high,o係情感上,就好似一群教徒睇見真神咁亢奮,放屁都會話香。情感流係由下至上,與其話達明令我o地high,不如話fans令達明high,以舞台表現,包括選曲來說,我覺得上一次演唱會好得多,重要要係有雙方的情感交流。 有朋友說得對:「好彩我o地自己high,唔係都幾弊。」


至於草蜢,上次臨退出前推出的幾張大碟,同偶像時期好大分別,尤其係最後一隻《三人主義》,一直係我的熱門選播唱片,至今都認為係最好o既,亦促使我買返佢o地o的舊碟,重睇o左兩場演唱會添。當年的演唱會,跳舞同慢歌係一半半,加上草蜢受歡迎程度已經逐漸下降,所以佢o地更加珍惜,一切得來不易,論氣氛同草蜢表現,我覺得係超水準,好touching。

但05年的演唱會,復出前一連串宣傳,與佢o地三個咁多年以來的氣勢與形象完全不符,催谷到好似上o左神臺咁,連一首普通到極的《我們》,都變成勁hit,就如林海峰所講,呢首歌只hit兩個字,就係「我們~~~~」,無論歌詞或風格,毫無突破。後來演唱會被谷起了,不斷加場,備受吹噓背後,大家重記唔記得,當年人o地只係開三場,都只係得90%入場率咋。人氣,真係有人肯吹就有o架啦。

3個40歲人的歌手,在台上猛跳猛唱,80%係快歌,有時連續十幾分鐘係咁跳,可能呢o的叫做high,但跳完之後,我發現草蜢係唔識跳舞的,只係識得腳印印,手fing fing,每首歌舞步都係一樣,連一早out o左o既性感極限的dancer,都俾媒傳炒作一番,全場音響勁嘈,唱慢歌都做唔出深情感覺。若兩次演唱會可以交換的話就會令人叫好,但家下先o黎扮潮,恕我未能接受。下次唔該唱少o的快歌,尤其係唔知唱乜o個o的。(雖然我全部都識)

重有林憶蓮,睇過好多次都肯再入場,就係因為佢把聲,而唔係佢個body,相信好多人都係咁諗。但係唔知點解,佢硬係要做返應該係20年前應做的事:又係大跳大唱!

選歌以「滄海遺珠」為大前提,即係冇乜人識唱啦!同行朋友o黎講,我識6成歌已叫做好叻,另外o的人悶都?著咁滯。當然係因為坐得高先會咁,俾400蚊入場又唔同,因為幾乎全部企晒響度跳,好似大型disco。去過disco的人都知,想跳舞的人,無論DJ播乜歌都會大跳一番,坐高少少的觀眾就好似坐在一塊玻璃櫥窗外面,見到裡面o的人好開心,但好似同自己無關。所以呢個演唱會的口碑好極端,我坐在山頂,當然認為係有史以來最差的林憶蓮演唱會啦。

就個人o黎講,最理想的林憶蓮,唔係帶住少少豬腩肉o係度跳住唱歌,fans根本唔介意佢o既身型,只要佢把聲重o係度就得啦,用簡簡單單的音樂襯底,唱乜o野歌都冇所謂。對憶蓮仍有期待,期待佢唔好再跳!

至於最新復出的關淑怡,過去係有o的好聽又大熱o既歌,但係咪足以支橕佢開演唱會呢?者大家唔記得佢點解會漸漸消失,又可能以為佢因為生仔而消聲匿跡。其實當年佢之所以out,係因為唱唔掂。

唔好以為聽錯,佢真係唱唔掂。當年佢開了兩場演唱會,我有幸入場睇過,先知唱幾首live同支橕一場演唱會係好唔同,除o左暴露佢歌唔夠,唔夠氣之外,控制現場氣氛唔得,而且重有走音。當年開3面台都搞戶成咁,實在唔知點解今日可以做阿姐,重一氣個開3場添,唯有讚嘆宣傳威力沒法擋。

老一輩歌手開演唱會,全部都想將紅館變成disco,所以大家都扮青春兼體力好,猛咁跳。但係只有最先o個個做得最好,佢叫做譚詠麟,20幾年前創先河叫人起身跳,到今時今日都係咁。撇開佢o係現實中亂講o野同埋包二奶,但講舞台上壓場感仍然無人能及,呢幾年開「左麟右里」演唱會,成日俾人話佢食李克勤老本,但事實證明,佢自己再開11場演唱會都全滿,克勤開4場都要等一排先可以加2場,叫座力高低立見。無論大家喜唔喜歡呢個懶後生的老歌手,都應該試o下睇佢o既live。

另一個跳足全場依然叫人眼前一亮o既歌手,叫郭富城。始終係舞林出身,加上7個排舞師,造成每part舞都各有特色,重有一個唔知殺死人定嚇死人的光頭look,以「好睇」計算,的確紅館有史以來最正的。



沒有留言: